這些年來, 在機上收卡片, 有乘客寫上電話號碼塞到我手上的情況遇過好幾次, 但以下的事, 我倒是第一次經歷, 不過, 一次都不想發生...
這是一班在外站休息時間極短的過夜機....
機門差不多關閉時, 我取得pax info, 正準備訂特別餐....
這次, 有名男子在我身邊擦身而過....
他問我可否坐在高級經濟客艙, 我答要付多一點錢才可以...
他再問我, 那麼坐商務客艙可以嗎? 我的答案都是一樣....
他問我要加幾多錢, 我說我要看一看, 一會兒才回答他...
剛巧我的朋友兼同事見狀, 說幫我看看要加幾多錢....
結果他不upgrade 了...
他坐在機尾的座位, 然後他要求要坐前一點的位置...
由於整班機都不滿, 都算有幾多的空位, 最後我找了三四個空位讓他揀....
而由於差不多起飛, 我說待會兒起飛後我再回來看看他的決定如何, 如果我太忙, 我會找位同事將他帶到新的座位.....
怎料他說:"我唔要其他同事, 我要你!"
就是因為他, 明明只得20 個特別餐, 到起飛前, 我對了1/3 都沒有...唉....
起飛後, 我發現他訂了特別餐, 為免他又截住我說很多很多話, 我對哂其他特別餐, 最後先對他的特別餐....
剛巧他隔離的乘客都訂了特別餐, 但睡著了...
於是男人說:"佢係我朋友, 不過我地唔係couple"......
...............................你們是不是couple 都不關我事....
我再問他調不調位時, 他答:"唔調啦, 我怕我調左, 你搵我唔到..."
然後, 每當我經過他身邊時, 他都會叫停我....
到派餐時, 由於負責男人那邊走廊的同事比較新, 做得比較慢, 我就與那同事做2 man cart., 我負責飲料.....
怎料男人又叫停我, 問:"點解頭先咁耐都唔見你既?"
(大佬, 我在galley 忙到死)
由於他時時截停我, 絕對影響了我為同事配給的速度, 後來我決定每一次都兜個大圈, 先經另一邊走廊, 再經過中間的galley, 將食物配給那位新同事.......
雖然走的路多了, 但總好過被男人截停......
有幾次我甚至絕對了他, 說我很忙....
而我亦將事件告知中間galley 的朋友以及老總知....
後來, 他開始問我住邊間酒店, 在外站逗留多久(12 個鐘都沒有呀), 酒店電話幾號(不知道), 外站的電話號碼幾號(沒有), 香港的電話號碼幾好....今晚同我去食xxx 好不好(唔好)....還說:"你俾個電話我, 我今晚打電話俾你..."
service 後, 他又時時入來galley 找我....兩位囝囝好醒目為galley 拉curtain....
而同事們卻不約而同告訴我, 他對會對我一個人笑, 其他同事serve 又或是對他說話, 他都黑面.......
而直到降落, 他仍然問我取電話號碼以及不斷約我...........
坐在男人後面那位ID 乘客已經笑到肚都攣........
降落時, 我擔心他會在機上等我, 於是一降落, 我做完door, 就入了洗手間避, 然後幾位囝囝囡囡以及我朋友幫我在外"睇水"...
隔了很久很久, 囝囝敲門, 叫我出來....
之後同事異口同聲對我說:"他真係企係度等你, 唔肯走..."
........................................
然後我的第六感話我知他下一步應該會在閘口等我........
"唔係掛...."
怎料一出閘口, 我朋友說:"佢係度呀!!!!"
"死...點算?"
唉, 路得一條....點走?
由於中間有店舖, 男人在店舖的左邊, 於是我與朋友繞右邊走.........
我們的制服那麼紅, 當然被發現了.....
我只聽到朋友以及後面跟來的同事對我說:"佢追緊黎呀...."
剛好朋友見到遠處有架無人駕駛埋站, 就說:"孤菇, 我地快d 追架車啦!", 祈望幫我脫身....
我一邊跑, 一邊聽到後面的同事說:"佢又跑呀!!!"
唉....那天, 我剛剛換了對新鞋著....所以腳有點痛, 想跑得快都難....(忽然埋怨自己為何要選擇今天換新鞋).......
最後, 我眼白白望著車門關閉.........
T.T
那刻我已經走頭無路............
後面跟上的同事見到男人想走到我身邊, 於是他們7-8 人將我圍住了....
忽然我好慶幸那天男同事比較多, 還慶幸我生得矮....
他們圍住我後, 基本上男人應該見不到我....
之後再上無人駕駛....
我一直不敢向後望....只是向在對面的同事打眼色, 問同事:"男人在哪裡?"
同事答:"你後面......."
T.T
出了無人駕駛....男人忽然由我後面走到出面...準備排隊過關........
起初我心諗應該告一段落....所以我放慢了腳步....
朋友繼續幫我"睇水".......
忽然朋友對我說:"你快D 過左關先, 因為就快到男人過關"
我終於明白....
原來男人忽然走在前面, 是想在我過關後截住我.......
(大家可能以為我諗多左, 但結果如朋友所料)
朋友叫其他同事讓我先過關....
那時朋友還心急過我:"快D 走啦...快D 走啦..."
"我仲未拎返我本PASSPORT 呀..."
那幾秒的時間, 我覺得好似過左成幾分鐘咁....(我又不敢叫職員姐姐看快一點將passport 還給我, 廢事她覺得我有可疑)
過完關...當時只有老總, 一位囡囡以及兩位機頭等著全SET CREW 齊哂才出機場上crew bus...
一出關, 我對老總說:"i'm so sorry...i have to go now...cuz that pax is chasing after me just now..."
由於我很少來這個外站, 不知道在哪裡上車, 於是兩位機頭一左一右帶著我出機場, 再安全送了我上車......
我。終。於。甩。身..............
後來朋友與同事們對我覆述, 男人過關後, 不斷"聚裡尋她", 最後好失望的表情...........
到達酒店, 為了安全起見, 又剛巧有阿姐不留在酒店, 所以我就取了她的房間....安全度過那個晚上....
不過驚嚇過後, 我幾乎整晚都睡不著..........
這件事對身邊的人是個笑話, 但對於我這個當事人, 當時我真的笑不出....
有人還問我:"你升左之後, 都已經好多時間係galley 內做野, 點解都會有呢d 事發生?"
我都不知道為何, 我也解釋不到........
"你係唔係45 度望住人呀?"
哼....你們真的夠"朋友"....=.=|||
總之這晚絕對是個惡夢....我好感激所有同事的幫助, 上至機頭, 下至囝囝囡囡, 我才可以成功脫身.......
回港後, 告訴我媽, 我前一晚是那麼瘋狂地逃走, 媽媽說:"俾著我就會除左對鞋逃走...."
我也曾經想過, 但.....空姐的儀態啊....
No comments:
Post a Comment